F27F0C7E-5E3C-4F9D-81BA-9736CBC646DD

Jaden ak kilti lakay !Nan Wanament fwontyè Ayiti ak Sendomeng kadnase. Patriyòt endiye yo nan Nòdès la bay Sendomeng repons li....jan yo kapab podyab. Sa merite yon gwo kout chapo nasyonal. Sa ap mande tou pou nou tout mare senti. Pa gen batay san mare senti.Ayisyen frè ak sè m yo, se vre Leta montre li absan nan dosye sa. Men repons Sendomeng merite a depann de nou tout. An nou retounen nan travay latè. An nou retounen fè jaden ak manje sa n plante. An nou aprann pitit nou yo manje lokal. Nou vin twò eklere pou mwen. Nou pa bay pitit nou manje mayi bouyi ak labouyi mayi. Se ak Kònfleks nou voye yo lekòl. Se pwodu enpòte preske nou mete nan bwat lench timoun yo pou lekòl. Nou pa ba yo labapen. Nou pa p bwè ji mango, tamaren, zoranj ak papay. Se ji enpòte nan bidon ak katon nou ba yo. Nou pa p ba yo zepina, sòs pwa ak bouyon konsonmen lokal. Se moso kuis ak blayi poul pèpè nou panse ki manje.Mwen temwen Jakmèl konn gen pwason ki ap vann bon mache : yon kòd pwason 6 grenn pou 750 goud ou byen mil goud. Non... nou pa vle sa se 2 ou 3 moso poul pépè mil goud ki enterese nou. Mwen menm lakay mwen, 90 pousan engredyen ak pwodui ki fè dejene ak dine se lokal. Lè nou manje lokal, se yon repons nou bay Sendomeng.Lè peyi w ak pèp ou danje, se chak grenn sitwayen ak patriyòt ki pou pote repons lan. Chak moun nan nivo pa li jan l kapab. An nou retounen nan kilti ak tradisyon manje lakay nou. Diyite ak respè nou dwe komanse nan lakou nou ak pa pòt lakay nou.Daly Valet23 novanm 2022